Агульныя інструкцыі. Гвалт у сям’і і сэксуалізаваны гвалт з боку партнёра ці мужа

Спасылка на план па асабістай бяспецы — спіс рэкамендацый, які дапаможа вам абараніць сябе і сваіх дзяцей. 

Памятайце: калі вы сутыкнуліся з гвалтам, у гэтым няма вашай віны. Ужываць гвалт ці не — гэта заўсёды выбар агрэсара, які не залежыць ад вас. Але ёсць крокі, якія вы можаце зрабіць, каб зрабіць сваё жыццё і жыццё вашых дзяцей больш бяспечным.

— Што рабіць, калі я ў небяспецы і мне тэрмінова патрэбна дапамога?

Даведайцеся нумар паліцыі / экстраных службаў (пажадана зрабіць гэта загадзя) і патэлефануйце на яго. 

— Што рабіць, калі я не ведаю мовы?

Калі вам трэба папрасіць дапамогі, але вы не ведаеце мясцовай мовы, вы можаце адчуць сябе яшчэ больш уразліва. Пастарайцеся загадзя вывучыць фразы, патрэбныя, каб папрасіць дапамогі і паведаміць пра сваё месцазнаходжанне. Напрыклад: «Мяне зваць …. Мой муж мяне збівае і можа забіць. Мне патрэбна дапамога. Прыязджайце па адрасе….».
У некаторых краінах вы можаце папрасіць паліцыю ці лекараў, каб вам падалі перакладчыка. Таксама вы можаце загадзя перакласці патрэбныя вам фразы ў Google Translate і захаваць іх ці запісаць. Напрыклад: «Мне патрэбна дапамога. Я не размаўляю па-англійску (ці на іншай мове, у залежнасці ад краіны). Ці можна паклікаць перакладчыка?».

— Калі ў мяне праблемы з міграцыйнымі дакументамі (напрыклад, пратэрмінаваная рэгістрацыя), ці бяспечна выклікаць паліцыю?

Калі ў вас пратэрмінаваная рэгістрацыя ці вы знаходзіцеся ў краіне нелегальна, праблемы могуць узнікнуць. Таму, калі вы маеце праблемы з міграцыйным статусам і сітуацыя з гвалтам не пагражае вашаму жыццю проста цяпер, бяспечней будзе звярнуцца ў арганізацыі, якія дапамагаюць пацярпелым ад гвалту, а таксама ў арганізацыі, якія дапамагаюць мігрантам і бежанцам (іх можна знайсці ў інтэрнэце). Таксама можна паспрабаваць звярнуцца па дапамогу ў дабрачынныя і рэлігійныя арганізацыі.

— Што сказаць, калі я выклікаю паліцыю?

На жаль, не ў кожнай краіне паліцыя дастаткова сур’ёзна рэагуе на выклікі наконт хатняго гвалту. Можна выкарыстоўваць фразу: «Я хачу паведаміць пра злачынства». Далей коратка апішыце сітуацыю, не прымяншаючы небяспекі (напрыклад, растлумачце, што партнёр або член сям’і вас збівае, пагражае забойствам, б’е так, што можа забіць).

— Калі вы ведаеце, што агрэсар мае зброю, што ён раней ужываў гвалт да людзей ці жывёл, мае алкагольную ці наркатычную залежнасць, абавязкова паведаміце пра гэта.

Таксама вам трэба назваць свае імя, прозвішча, імя па бацьку, дату нараджэння і адрас.

— Як хутка прыедзе паліцыя?

Нажаль, адказ на гэтае пытанне залежыць ад краіны. Часам паліцыя прыязджае цягам некалькіх хвілін, а часам яе даводзіцца чакаць гадзінамі.

— Што рабіць, калі паліцыя не прыязджае?

Можна паспрабаваць патэлефанаваць у паліцыю яшчэ раз і сказаць, што вы па-ранейшаму ў небяспецы.

— Што сказаць паліцыянтам, калі яны прыедуць?

Падрабязна раскажыце, што з вамі адбылося. Можна загадзя апісаць на паперы паслядоўнасць падзей, каб не ўпусціць нічога важнага. 

Хутчэй за ўсё, вас спытаюць, колькі ўдараў вам нанеслі і ў якія месцы. Паспрабуйце ўспомніць усё і растлумачыць як мага падрабязней. Калі агрэсар нанёс матэрыяльную шкоду (напрыклад, разбіў тэлефон, пашкодзіў рэчы), таксама паведаміце пра гэта.

Калі вы і раней цярпелі ад гвалту з боку гэтага чалавека, распавядзіце пра ўсе выпадкі. Зазначце, ці звярталіся вы па медыцынскую дапамогу, ці звярталіся ў паліцыю, ці былі сведкі. Калі яны былі, дайце паліцыі іх імёны і кантакты.

Калі вы ведаеце, што агрэсар мае зброю, што ён раней ужываў гвалт да людзей ці жывёл, мае алкагольную ці наркатычную залежнасць, абавязкова паведаміце пра гэта. 

Папрасіце паліцыю забяспечыць вашу бяспеку і забраць гэтага чалавека ў пастарунак. Таксама папрасіце, каб вам далі накіраванне ў медыцынскую арганізацыю/ спецыялізаваную ўстанову — там зафіксуюць прычыненыя пашкоджанні.

Перш чым падпісваць любыя дакументы, уважліва чытайце іх. Калі ў пратаколе апытання ёсць недакладнасці, папрасіце зрабіць праўкі.

— Ці могуць агрэсара забраць з дому?

Гэта залежыць ад заканадаўства канкрэтнай краіны і канкрэтнай сітуацыі. Як правіла, паліцыя забірае агрэсара, калі сітуацыя гвалту працягваецца і ёсць пагроза жыццю і здароўю. Вы можаце папрасіць паліцыянтаў забяспечыць вашу абарону і спытаць, ці могуць яны адвесці крыўдніка.

— Ці могуць агрэсару забараніць да мяне набліжацца?

Гэта залежыць ад заканадаўства канкрэтнай краіны і канкрэтнай сітуацыі. У некаторых краінах ёсць механізмы, якія забараняюць агрэсару набліжацца да пацярпелай, кантактаваць з ёю і г.д. Спытайце пра гэта супрацоўнікаў паліцыі, а таксама звярніцеся ў арганізацыі дапамогі пацярпелым, яны дапамогуць вам скласці план бяспекі. 

— Як звярнуцца па медыцынскую дапамогу?

Можна самастойна звярнуцца ў бліжэйшую медыцынскую ўстанову. Калі траўмы сур’ёзныя і вам цяжка перасоўвацца, варта выклікаць хуткую дапамогу. Даведайцеся нумар паліцыі / экстраных службаў (пажадана зрабіць гэта загадзя) і патэлефануйце на яго. 

Пры размове з лекарам паведаміце яму, што менавіта адбылося, як гэта здарылася і дзе, куды менавіта наносіліся ўдары. Пакажыце медыкам усе пашкоджанні, якія ёсць на целе — сінякі, ранкі, выцятыя месцы, пачырваненні і г.д. Папрасіце лекара падрабязна апісаць усе траўмы ў дакументах. Не саромейцеся расказваць усё ў падрабязнасцях і казаць, хто менавіта вас збіў. 

Прасачыце, каб лекар запісаў усё, што вы яму распавялі, і пазначыў дату атрымання траўмаў. Гэтыя дакументы маюць вялікае значэнне.

Пераканайцеся, што медык правільна і падрабязна апісаў пашкоджанні, месцы, у якіх яны знаходзяцца, іх памер і тэрмін утварэння, а таксама спосаб, якім яны былі зроблены. 

Пажадана атрымаць даведку пра тое, што вы звярталіся ў медыцынскую ўстанову наконт цялесных пашкоджанняў.

Не забудзьцеся самі сфатаграфаваць сляды збіцця, каб далучыць іх да справы ў далейшым. Апроч гэтага збірайце любыя доказы таго, што адбылося, і прыцягвайце сведкаў.

— Ці патрэбны мне грошы ці якія-небудзь дакументы для выкліку хуткай дапамогі?

Гэта залежыць ад канкрэтнай краіны. У некаторых краінах экстраная дапамога надаецца бясплатна.  

— Куды звярнуцца па юрыдычную дапамогу і суправаджэнне?

Паглядзіце ў інтэрнэце кантакты мясцовых некамерцыйных і дзяржаўных арганізацый, якія дапамагаюць пацярпелым ад гвалту і мігрантам. Таксама можна паспрабаваць звярнуцца па дапамогу ў дабрачынныя і рэлігійныя арганізацыі. У некаторых краінах пацярпелыя ад хатняга гвалту маюць права на бясплатную юрыдычную, сацыяльную, псіхалагічную і іншыя віды дапамогі.

Ці дапамаглі нашы інструкцыі?

Пры складанні інструкцый мы спадзяваліся на дапамогу валанцёраў і юрыстаў з розных краін. Калі нешта пайшло не так – вам не адказала арганізацыя, вы выявілі памылку або інструкцыі былі недастаткова дакладныя – раскажыце нам пра гэта. Напішыце на адрас: help@labirint.online